মাতাল স্বামীয়ে ঘৰত সঞ্চিত ধান বজাৰত বিক্ৰী কৰি পুনৰ মদ খোৱাৰ পৰিকল্পনা কৰিছিল। কিন্তু পত্নীৰ বাধাৰ বাবে সেই পৰিকল্পনা বিফল হৈছিল। ফলস্বৰূপে স্বামী আৰু স্ত্ৰীৰ মাজত আৰম্ভ হৈছিল কাজিয়া। শেষত পত্নীৰ লাঠিৰ আঘাতত মৃত্যু হয় স্বামীৰ। এই ঘটনা সংঘটিত হয় পশ্চিম বংগৰ বাংকুৰাৰ বিনোদনগৰ অঞ্চলত। অভিযোগ পোৱাৰ লগে লগে আৰক্ষীয়ে অভিযুক্ত পত্নীক গ্ৰেপ্তাৰ কৰে।

জানিব পৰা মতে, বাংকুৰাৰ ওণ্ডা থানাৰ কল্যাণী গ্ৰাম পঞ্চায়েতৰ বিনোদনগৰ অঞ্চলৰ বাসিন্দা বিকাশ মাল এজন দিন হাজিৰা কৰা শ্ৰমিক আছিল। মদৰ প্রতি অত্যধিক আসক্তিৰ বাবে তেওঁ কাম-কাজ কৰিবলৈ বহু বছৰ ধৰি বাদ হৈছিল। তেওঁৰ পত্নী সুলেখা মালে তিনিটা সন্তানক ডাঙৰ কৰিছিল। সুলেখাই তেওঁৰ ডাঙৰ জীয়েকৰ বিয়াও দিছিল। সুলেখাই কষ্ট কৰি কেইটামান ছাগল কিনি উপাৰ্জনৰ এক উপায় সৃষ্টি কৰিছিল।

শেহতীয়াকৈ, বিকাশে পৰিয়ালৰ ছাগলীবোৰ চৰাবলৈ যোৱাৰ অজুহাতত ছাগলী বিক্ৰী কৰি মদ খোৱাৰ আৰম্ভণি কৰিছিল। বিগত সময়ত ঘৰত সঞ্চিত তিনিবস্তা ধান বিক্ৰী কৰি মদ খোৱাৰ পৰিকল্পনা কৰিছিল বিকাশে। বিকাশে ধানখিনি বিক্ৰী কৰাৰ উদ্দেশ্যে ঘৰৰ পৰা বাহিৰলৈ লৈ গৈ আছিল, তেওঁৰ পত্নী সুলেখাই এই কথা লক্ষ্য কৰিছিল। পৰিয়ালটোৰ একমাত্ৰ উৎস তিনিবস্তা ধান বিক্ৰী কৰাত বাধা দিয়াৰ সময়ত ঘৰৰ চোতালত দুয়োৰে মাজত তীব্ৰ কাজিয়া আৰম্ভ হয়। ইয়াৰ মাজতে, সুলেখাই এডাল ডাঙৰ লাঠি তুলি ললে আৰু বিকাশক মাৰিবলৈ আৰম্ভ কৰিলে। যাৰ ফলত মৃত্যু হয় বিকাশৰ।